نفت الفنانة حلا شيحة الأخبار التي انتشرت خلال الساعات الماضية بطلاقها من المنتج معز مسعود.
ونشرت الفنانة صورة لها عبر حسابها على الانستغرام، وأكدت خلالها أن ما كتب عن طلاقها من معز مسعود غير صحيح، موضحة أن المنشور الذي كتبته قبل أيام لم تقصد به مرورها بمشاكل شخصية مع زوجها.
وقالت شيحة: لكل المتابعين والمحبين على صفحتي وفي الوطن العربي حابة أقولكم مفيش أي خبر اتكتب عن معز وعني يخص الطلاق صحيح وكلامي في البوست اللي فات كان كلام عام ولم أقصد بيه حد معين أبدا.
وتابعت: معز بعيد عن الكلام ده تماما بالعكس هو سبب كبير لحاجات جميلة في حياتي وحياة أولادي و مشفتش كتير زي أخلاقه واحترامه وعيب الكلام اللي بيتقال عن صفحات السوشيال ميديا كله مش صح أبدا.
وأضافت:والله في مشاكل أكبر بكتير وحاجات أهم بكتير ممكن نتكلم فيها وأنا على صفحتي بحب اشارك جمهوري ساعات بمعاني بحسها وبحسهم زيي وبحب اتواصل معاهم وابقى موجودة معاهم مش أكتر من كدة … بالنسبة لحجابي أنا قلت بحاول زيي زي بنات كتير وأكيد مش أحسن حاجة بس أنا كدة دلوقتي والحمد لله.
واختتمت كلامها: أنا مش شيخة أنا إنسانة عادية جدا ليا حسناتي وليا سيئاتي والبشر كلهم كده فبلاش حد يزايد علي حد وبدل ما نتريق أو نقول كلام مش مهم نكون متصالحين مع نفسنا ونبطل نحكم على بعض أحنا بشر مش ملايكة، يلا أنا مسامحة الكل معلش بشر بردو.
وكانت حلا شيحة نشرت قبل أيام مجموعة صور لها مع أبنائها وكتبت تعليقا عليها: لحظات في حياتنا بتعدي مع ناس بنقابلهم مرة في العمر ولحظات مع أولادنا بنحس بيها بفرحة وحب وأمل ولحظات مع نفسنا بنتأمل فيها حياتنا كل أيامنا لحظات … علشان كدة مفيش حاجة تستاهل الزعل والتفكير الزيادة وأجمل حاجة أن الواحد لما يتعب أو يحس أنه تايه أو متلخبط لازم يبقى متأكد أن مشاعره بتقوله حاجات محتاج يعرفها أو يفهمها او يفهم نفسه أكتر، ونتعلم ومش عيب نقول غلطنا ومش عيب نصلح أخطاءنا بس أهم حاجة منكملش ونعاند نفسنا ونعاقب نفسنا ونحكم على نفسنا بالفشل، الفشل أننا نسيب نفسنا جوا نفس المشاكل ونستسلم.
يذكر أن آخر أعمال حلا شيحة فيلم "مش أنا" مع تامر حسني ماجد الكدواني، سوسن بدر وغيرهم نخبة من النجوم. الفيلم قصة تامر حسني وإخراج سارة وفيق.
المصدر : وكالات
